सर्वप्रथम, जेनजीको भर्खरै सम्पन्न सफल आन्दोलन (प्रदर्शन) का क्रममा सहादत प्राप्त साथीहरू प्रति हार्दिक श्रद्धाञ्जली अर्पण गर्दै घाइते साथीहरूको शीघ्र स्वास्थ्य लाभको कामना गर्दछु ।

भ्रष्टाचारविहीन राज्य संयन्त्र निर्माण गर्नु, भ्रष्टाचार गर्नेहरुलाई कानूनी कारबाहीको दायरामा ल्याई दण्डित गर्नु, र भ्रष्टाचारबाट आर्जित सम्पत्ति राष्ट्रियकरण गरी त्यसको लागि छुट्टै कोष स्थापना गर्ने हाम्रो प्रमुख उद्देश्य हो । 

उक्त कोषमा संकलित रकमलाई देशको विकास कार्यमा प्रयोग गर्नु जरुरी छ । साथै, शान्त र सभ्य समाज निर्माण गरी एक्काइसौँ शताब्दी सुहाउँदो व्यवस्थामा अघि बढ्नु हाम्रो सामूहिक आवश्यकता हो।

जेनजी पुस्ताको चेतनाअनुरूप विकसित राष्ट्रहरूसँग प्रतिस्पर्धा गर्न सक्ने सक्षम जनशक्ति निर्माण गर्ने महान अभिलाषा हामीसँग छ । त्यसैले, आन्दोलित जेनजी पुस्ताको भावना आत्मसात् गर्दै सरकारले नयाँ नीतिहरू अवलम्बन गर्नु अपरिहार्य छ ।

आगामी सम्पूर्ण गतिविधिमा प्रत्यक्ष जेनजी समूहको सहभागिता सुनिश्चित नगरेमा फेरि जेनजीहरू सडकमा आउनुपर्ने परिस्थिति उत्पन्न हुन सक्छ । यस यथार्थलाई मध्यनजर गर्दै, जेनजीको वास्तविक प्रतिनिधिलाई प्रत्यक्ष रुपमा सरकारमा सहभागी गराउन आवश्यक छ । 

सोही आधारमा अब बन्ने मन्त्रिपरिषद्मा समेत जेनजीको वास्तविक प्रतिनिधि समेटिनु पर्ने माग सम्बन्धित सबै पक्षसँग गर्दछ । जेनजीको नाममा अवसरवादी र नक्कली जेनजीहरुले मौका नपाउन् । जय मातृभूमि ।