काठमाडौं । अर्थशास्त्री डा. दिलनाथ दंगालले समस्यामा रहेको नेपालको अर्थतन्त्रमा झनै चूनौति थपिएको बताएका छन् । रिर्पोटस क्लव नेपालले आयोजना गरेको अन्तरक्रियामा उनले नेपाली अर्थतन्त्र पछिल्लो घटनाले धेरै पछि परेको दावी गरे । 

उनले भने,‘अहिले भयावह स्थिति छ । सबभन्दा ठूलो कुरा निजी क्षेत्र, अत्यन्तै धेरैलाई रोजगार दिएको क्षेत्र हो । निजी क्षेत्र दुःखी छ । हामीसँगको कुराकानीमा उहाँहरुले अब नेपालमा बसेर लगानी गर्ने आधार के ? भ्रष्टाचार गरे सरकारले गर्ने हो । कुशासन र अनियमितता सरकारी क्षेत्रमा हुन्छ, हामीलाई किन आक्रामण ?’ भनेर प्रश्न गरेका छन् ।

रोजगारी कटौती हुनु, भाटभटेनी तथा गाडीका सोरुम तहसनहस हुनुले दिर्घकालसम्म समस्या हुने उनको भनाई छ ।  

उनले भने, ‘६० अर्ब बराबरको वरिपरिमा बिमा घाटामा जान्छ । नोट  २० प्रतिशत नोट जलेका छन् । डलर पनि जलेको छ ।’

उनको तर्क छ, ‘विकास खर्च शून्यमा आउँछ । निजी क्षेत्रबाट आउने राजश्व गुम्छ । राज्यले सब्सिडी दिएर निजी क्षेत्रलाई बचाउनुपर्छ । विदेशी पर्यटक आउने सम्भावना कम देखिन्छ । युवा पलायन रोक्न सकिँदैन । नेपालमा बस्छु भन्नेहरु युवाहरु पनि देश छोड्ने  छन् । ’

अर्थतन्त्र आन्दोलन हुनुअघिको दिनसम्म पुर्याउनको लागि नै २० वर्ष लाग्ने उनको तर्क छ । उनी भन्छन्, ‘यस्ता घट्नाबाट पाठ सिक्ने हो भने पूननिर्माणमा जान सक्छौं । सानो र छरितो सरकार बन्नुपर्छ । सरकारको खर्च कटौती गर्नुपर्छ । मन्त्रालयगत खर्च कटौती जरुरी छ  ।’