काठमाडौं । वसन्तको नेतृत्वमा रहेको नेपाल कम्युनिस्ट पार्टी र दिनेश बर्तौलाको नेतृत्वमा रहेको नयाँ जनवादी मोर्चा नेपाल बीच ऐतिहासिक एकता सम्पन्न भएको छ । एकतापछि संयुक्त रूपमा जारी गरिएको विज्ञप्तिमा शहर केन्द्रित जनविद्रोहमार्फत क्रान्तिकारी रूपान्तरण अघि बढाउने लक्ष्य उद्घोष गरिएको छ । एकीकृत पार्टीको नयाँ नाम नेकपा (क्रान्तिकारी केन्द्र) राखिएको छ ।

संयुक्त दस्तावेजमा कम्युनिस्ट आन्दोलनको सैन्य र राजनीतिक सिद्धान्तबारे स्पष्ट वैचारिक मान्यता राख्दै भनिएको छ – ‘सर्वहारा वर्गको सैन्य सिद्धान्त भनेको दीर्घकालीन जनयुद्ध, राष्ट्रिय मुक्ति युद्ध, जनविद्रोह र नयाँ सांस्कृतिक क्रान्तिका सिद्धान्तहरूको एकीकृत सर्वहारा दृष्टिकोण हो ।

यी मध्ये कुन स्वरूप अग्रपंक्तिमा रहनेछ भन्ने कुरा तात्कालिक ऐतिहासिक अवस्थाको वर्गीय तथा राष्ट्रिय अन्तरविरोधहरू कसरी विकास भइरहेका छन भन्ने विश्लेषणद्वारा निर्धारण हुन्छ । कुनै एक स्वरूप प्रधान बन्ने अवस्थामामा अन्य रूपहरूले सहायक, परिपूरक तथा द्वन्द्वात्मक भूमिका निर्वाह गर्छन ।’

एकीकृत पार्टीका अनुसार वर्तमान नेपाली समाज संक्रमित, अस्थिर र संकटग्रस्त अवस्थाबाट गुजरिरहेको छ, जहाँ शहर केन्द्रित विद्रोह नै मुख्य संघर्षरेखा बन्ने निष्कर्षमा पुगेको छ । विज्ञप्तिले स्पष्ट दाबी गर्छ,‘अहिलेको विशिष्ट संक्रमित तथा संकटग्रस्त परिस्थितिमा शहर केन्द्रित जनविद्रोह नै मूल संघर्ष रेखा हो, जसले अन्ततः अनिवार्य रूपमा राष्ट्रिय मुक्ति युद्धको रूप धारण गर्नेछ ।

विज्ञप्तिले क्रान्तिको नाममा हुने यान्त्रिक नक्कलवाद र ऐतिहासिक सन्दर्भविहीन प्रतिलिपीवादलाई कठोर रूपमा अस्वीकार गरेको छ । दस्तावेजमा भनिएको छ – ‘नेपाली समाज विश्वका कुनै पनि समाजसँग हुबहु मेल खाँदैन; यसको ऐतिहासिक विकास, सामाजिक संरचना, जातीय–भाषिक र सांस्कृतिक विविधता, तथा आर्थिक–राजनीतिक सम्बन्धहरू अद्वितीय छन । यही अद्वितीयता नै नेपाली समाजको मौलिक विशेषता हो । यसकारण, नेपाली क्रान्ति कुनै अन्धनक्कल होईन, नेपाली समाजका मौलिक विशेषता र विशिष्ट विरोधाभासहरूबाट जन्मिने नयाँ प्रकारको क्रान्तिकारी रूपान्तरण प्रक्रिया हुनेछ ।’

दुई क्रान्तिकारी शक्ति बीचको यो एकतालाई मुलुकको वर्गसंघर्षको नयाँ ऊर्जा, जनआन्दोलनको पुनःउभार र राष्ट्रिय मुक्ति तथा समाजवादी रूपान्तरणतर्फको ऐतिहासिक मोड का रूपमा हेरिएको छ । नयाँ पार्टीले छिट्टै शहर–केन्द्रित जनविद्रोहको संगठन, मोर्चा निर्माण र राजनीतिक आह्वान सार्वजनिक गर्ने घोषणा गरेको छ ।