थाहानगर,६ जेठ /
टिस्टुङको नौखण्डे र आग्राको मोरियामा भएको कार्यक्रममा हरियो सागपात, गाँजर, अण्डा, गेडागुडी, घिउ आदि पोषणयुक्त सामग्राी जुटाएर सहभागीहरुकै बीच जाउलो तयार पारिएको थियो । तयार जाउलो स्थानीयले चाखेपछि निकै स्वादिलो भएको बताएका थिए ।
मंगलबार टिस्टुङमा भएको कार्यक्रममा ९१ जना र बुधबार मोरियामा भएको कार्यक्रममा एक सय जना सहभागी भएको बाल कल्याण समाजका परियोजना संयोजक कुमार नेगीले जानकारी दिए ।
कार्यक्रममा  बच्चालाई खुवाइने सामान्य जाउलो र हरियो सागपात, पहेलो फलफुल, अण्डा, गेडागुडी राखी बनाएको जाउलोको भिन्नता बारेमा पनि जानकारी गराइएको थियो । सहभागीहरुलाई जनस्वास्थ्य विषयमा स्नातकोत्तर गरिरहेका निलम शर्मा र मनिष सुवेदीले जाउलो बनाउने तरिका र बच्चालाई खुवाउने तरिकाबारे जानकारी गराएका थिए । उनीहरुले पोषणयुक्त जाउलो बनाउन चाहिने आवश्यक सामग्री, बनाउने तरिका र यसबाट हुने फाइदाका विषयमा  जानकारी गराएका थिए ।
बुधबार आग्रामा भएको कार्यक्रममा टियरफण्डका एरिया कोअर्डिनेटर मुकुन्दराज केसी, वास अफिसर बिन्दु  सिग्देल, बाल कल्याण समाजका सुपरभाइजर बीरबहादुर थापा, उमा कार्की तथा सामुदायिक परिचालकहरु सहभागी थिए । त्यस्तै गाविसका राजनीतिक दलका पदाधिकारी, महिला स्वास्थ्य स्वयंसेविका, वडा नागरिक मञ्चका सदस्यहरु ल्गायत जाउलो प्रदर्शनीमा सहभागी थिए ।
शिशुहरु ५–६ महिना पुगेपछि आमाको दूधको साथ लौहतत्व, भिटामिन ‘सी’, ‘ए’ भएको खानेकुरा दैनिक खानामा समावेश गर्नुपर्ने र यसमा सफा र उपयुक्त तवरले तयार पारेको लिटो, सर्वोत्तम पीठो, नरम पारी बनाएको जाउलो दैनिक खानामा समावेश गर्न सकिने स्वास्थ्यकर्मीहरुको सुझाव छ ।
गाउँघरमा जाउलोको सामग्री सजिलै पाउन सकिने भएकाले यससम्बन्धी जानकारी दिइएको बाल कल्याण समाजले जनाएका छ  । जाउलो बनाउँदा अन्न तथा दालका साथै हरियो सागसब्जी मसिनो गरी काटेर मिलाई बच्चाले खान सक्ने किसिमको नरम हुनुपर्छ । यसरी तयार पारेको जाउलोबाट आवश्यक शक्ति, प्रोटिन पाउनुको साथै भिटामिन र लौहतत्व प्राप्त गर्न सकिन्छ ।