Powered by Blogger.
कविताः गरुँ सुकर्म


भवानी न्यौपाने ‘भावना

तिमी राम बन्नू म सीता बनूँला
सपार्दै म आत्मा उदाई रहूँला ।
दुबै एक बन्दै गरौंला सुकर्म
यही मंत्र जप्दै बनोस् पूर्ण जन्म ।।

पुकार्दै म द्यौता गरूँ काम राम्रो 
यही कामले लेखियोस् नाम राम्रो । 
म देखूँ सदा देव द्यौता पुजारी
म डाकूँ सधैँ स्वर्ग धर्ती पुकारी ।।

रसीला र मीठा नयाँ गीत गाऊँ 
यही देशबासी संगै प्रीत लाऊँ । 
फलाऊँ यहीँ अन्न भर्ने भकारी 
यहीँ पोख्न पाऊँ म माटो सिँगारी ।।

सजाई म डाडा पखेरा फुलाऊँ 
बनी निर्झरा भीर पाखा सुसाऊँ ।
चखेवा र डाँफे रहून यो वनैमा 
म हेर्दै रमाई बसूँला मनैमा ।।

सधैँ चित्तमा होस् पियारो स्वदेश 
बनोस् ढुक्ढुकी झैँ स्वभाषा स्वभेष । 
मलाई सधैँ लाग्छ नेपाल राम्रो 
यही नै छ संसारमा स्वर्ग हाम्रो ।।

म बाचूँ यहीँ भूमिमा नित्य हाँस्तै 
रमाऊँ यहीँ मारुनी नाच नाच्तै ।
म रोदी जमाई रमूँ देउडामा
भनूँ नित्य प्यारी म नेपाल आमा ।।

–तुलसीपुर –५, ग लाइन दाङ



0 comments

Write Down Your Responses

pfizer vaccine