उपप्रधानमन्त्री पोखरेलबाट काठमाडौँ नेचुरोपेथी अस्पतालको औपचारिक उद्घाटन
![](https://blogger.googleusercontent.com/img/b/R29vZ2xl/AVvXsEjJCCMTl4wZPHWi5w0Oyrs7X13cg9pk7dqvYoAVP-R3ANssgZ-o6hSMhwdRyFmIxjbztpvz2sZgCBBxV997CVm-fLh4vclcP6dEzo1vuFu9FM7fP8gYd7N0pkiNnGwxEJaMEz8jjznQ5E4/s640/77271636_10218714686312755_5726869689808715776_n.jpg)
काठमाडौं । अत्याधुनिक सुविधासहित सुरु भएको काठमाडौँ नेचुरोपेथी अस्पतालको उपप्रधानमन्त्री एवं रक्षामन्त्री ईश्वर पोखरेलले समुद्घाटन गर्नुभएको छ ।
काठमाडौँको बसुन्धरामा स्थापित अस्पतालको आइतबार भव्य समारोहबीच उद्घाटन गर्दै उपप्रधानमन्त्री पोखरेलले प्राकृतिक चिकित्सा पद्दतिबाट उपचार हुने युनिक अस्पताल भएकाले आफ्नो तर्फबाट सक्दो सहयोग गर्ने प्रतिबद्दता पनि जनाउनुभयो । ‘सायद म यस अस्पतालको उद्घाटन गर्न नआएको भए सँधै पछुताउने रहेछु, यस अस्पतालको दिने अत्याधुनिक सेवाहरु थाहा पाउँदा निकै खुसी भएको छु ।’ उपप्रधानमन्त्री पोखरेलले भन्नुभयो ।
गुणस्तरीय स्वास्थ्य भए मात्र ‘समृद्ध नेपाल, सुखी नेपाली’ को राष्ट्रिय आकाक्षा पूरा हुने उहाँले बताउनुभयो । प्राकृतिक चिकित्साको माध्यमबाट आम नागरिकलाई स्वास्थ्य सेवा दिएर काठमाडौँ नेचुरोपेथी अस्पतालले महत्वपूर्ण कामको थालनी गरेको बताउँदै उहाँले भन्नुभयो– ‘राम्रो कामको थालनी भएको छ, अखण्डित ढङ्गले सेवा प्रदान गर्नुहोस् ।’ अस्पतालको विकासका लागि सरकारका तर्फबाट सहयोग गरिने उहाँको भनाइ थियो ।
कार्यक्रममा पूर्वमन्त्री रामबहादुर गुरुङले दीर्घकालिन रोगीहरुको संख्या बढेकाले प्राकृतिक चिकित्साको खाँचो दिनानुदिन बढ्दै गएको बताउनुभयो ।
उहाँले काठमाडौँ नेचुरोपेथी अस्पतालले गुणस्तरीय सेवा दिनेमा आफू ढुक्क रहेको बताउनुभयो । वरिष्ठ प्राकृतिक चिकित्सक हरिप्रसाद पोखरेलले सरुवा रोगको उपचारका लागि ठूलो धनराशि खर्च गरे पनि नसर्ने रोगका बारेमा काम गर्न नसकेको बताउनुभयो । स्वास्थ्य तथा जनसंख्या मन्त्रालय एलोपेथिक मन्त्रालयका रूपमा मात्र सिमित उहाँको भनाइ थियो ।
अस्पतालका अध्यक्ष गणेश पाण्डेले स्थापनाको डेढ महिनामै अस्पतालमा बिरामीको चाप बढ्ेको बताउनुभयो । प्राकृतिक चिकित्सा, फिजियोथेरापी, मसाजथेरापी, हाइड्रोथेरापी, योगथेरापी, अकुपञ्चर, अकुप्रेसर, भोजन परामर्शलगायत सेवा प्रदान गर्ने अध्यक्ष गणेश पाण्डेले जानकारी दिनुभयो । अस्पतालमा बहिरङ्ग, अन्तरङ्ग, प्रयोगशाला, विशिष्ट आवास कक्ष, जीवनशैली क्लिनिक आदि सुविधा छन् ।
विनाऔषधि र विनाशल्यक्रिया उपचार गरिने उक्त अस्पतालमा प्यारालाइसिस, नशा च्यापिएको, हड्डी खिइएको तथा कम्मर, गर्धन दुखाई, बाथ, उच्च रक्तचाप, ग्याष्ट्रिक, मोटोपन, दम जस्ता रोगको उपचार गरिने अस्पतालका मेडिकल डाइरेक्टर डा यञ्जन गैरेले जानकारी दिनुभयोे ।
कार्यक्रममा शरीरको तल्लो भाग नचल्ने भएर काठमाडौँ नेचुरोपेथी अस्पतालमा भर्ना भएर बसेका त्रिपाठी तिवारीले अन्य अस्पतालमा उपचार हुन नसकेपछि आफू यस अस्पतालमा आएको र आएको एक साताबाटै ठीक भएको उहाँले बताउनुभयो ।
कार्यक्रममा प्रदेश सभा सदस्य नारायण सिलवाल र दीपक निरौला, नेपाल प्रहरीका प्रमुख सर्वेन्द्र खनाल, सशस्त्र प्रहरी महानिरीक्षक शैलेन्द्र खनाल, नेपाली सेनाका उपत्यका पृतनापति निरञ्जन श्रेष्ठ, राप्रपाका नेता हेमजङ गुरुङ, प्रभु बैंकका सिइओ अशोक शेरचन, मेगा बैंककी डुपेटी सिइओ रविना देशराज श्रेष्ठ, मुक्तिनाथ बैंकका सिइओ पद्युमन पोखरेल, रियालबल इन्स्योरेन्सका सिइओ नारायणबाबु लोहनी, चौधरी ग्रुपका कार्यकारी निर्देशक करण चौधरी, एनआरएनका उपाध्यक्ष अर्जुनकुमार श्रेष्ठ, नेपाल पत्रकार महासंघका महासचिव रमेश विष्ट, नेपाल टेलिभिजनका अध्यक्ष डा। महेन्द्र बिष्ट, वरिष्ठ लोकगायक बद्री पंगेनीसहित विभिन्न व्यत्तित्वहरु उपस्थित थिए ।
कार्यक्रमपछि अध्यक्ष पाण्डेले भन्नुभयो, ‘हामीलाई शुभकामना र बधाई दिन पाल्नुभएका सबैप्रति कृतज्ञ छु । एउटा ठूलो सपनाले आज गति लिएको छ । अप्ठेरो तर आफूलाई निकै आनन्द लाग्ने बाटो हो मेरा लागि । तर पनि जीवन हो, चुनौती नझेली कहाँ हुन्छ र ! हो, चुनौती झेल्न तस्सँदै एकल लगानीमा अस्पताल खोल्न तम्सिएको थिएँ । जुन आज पूरा भएको छ । तपाईंहरुको माया मिलिरहोस् ।’
![](https://blogger.googleusercontent.com/img/b/R29vZ2xl/AVvXsEgOqnDwivl7MGWRTxhyphenhyphennYrtl_fBavsQpthjjgPm_pJwzRKF2eNBTRvzj1_VRjbsVnZKmueN_Z5z5kdGJuv2puJg86zKAJZflvdXEunwEgHY3F56KZLE8EfMbI81e5XqVvbWSY-KCVEmD8o/s640/77304614_10219194087476756_143314348473843712_o.jpg)
0 comments
Write Down Your Responses